ក្រុមប្រឹក្សារដ្ឋ ដែលជាគណៈរដ្ឋមន្ត្រីរបស់ប្រទេសចិន ថ្មីៗនេះបានអនុម័តថ្ងៃទី 19 ខែសីហា ដែលត្រូវបានកំណត់ថាជាទិវាគ្រូពេទ្យចិន។ គណៈកម្មាធិការសុខភាព និងផែនការគ្រួសារជាតិ និងនាយកដ្ឋានពាក់ព័ន្ធនឹងទទួលបន្ទុកនេះ ដោយទិវាគ្រូពេទ្យចិនដំបូងគេនឹងប្រារព្ធនៅឆ្នាំក្រោយ។

ទិវាគ្រូពេទ្យចិន គឺជាថ្ងៃឈប់សម្រាកវិជ្ជាជីវៈជាច្បាប់ទីបួននៅក្នុងប្រទេសចិន បន្ទាប់ពីទិវាគិលានុបដ្ឋាយិកាជាតិ ទិវាគ្រូបង្រៀន និងទិវាអ្នកសារព័ត៌មាន ដែលជាការកត់សម្គាល់ពីសារៈសំខាន់នៃគ្រូពេទ្យក្នុងការការពារសុខភាពប្រជាជន។

ទិវាគ្រូពេទ្យចិននឹងប្រារព្ធឡើងនៅថ្ងៃទី 19 ខែសីហា ដោយសារសន្និសីទជាតិស្តីពីអនាម័យ និងសុខភាពលើកដំបូងក្នុងសតវត្សថ្មីត្រូវបានប្រារព្ធឡើងនៅទីក្រុងប៉េកាំងនៅថ្ងៃទី 19 ខែសីហា ឆ្នាំ 2016។ សន្និសីទនេះគឺជាព្រឹត្តិការណ៍ដ៏សំខាន់មួយសម្រាប់បុព្វហេតុសុខភាពនៅក្នុងប្រទេសចិន។

នៅក្នុងសន្និសីទនេះ ប្រធានរដ្ឋ Xi Jinping បានបញ្ជាក់ពីគោលជំហរសំខាន់នៃការងារអនាម័យ និងសុខភាពក្នុងរូបភាពទាំងមូលនៃបក្ស និងបុព្វហេតុរបស់ប្រទេស ក៏ដូចជាការបង្ហាញនូវគោលការណ៍ណែនាំសម្រាប់ការងារអនាម័យ និងសុខភាពរបស់ប្រទេសក្នុងយុគសម័យថ្មី។

ការបង្កើតទិវាគ្រូពេទ្យគឺអំណោយផលដល់ការលើកកំពស់ឋានៈរបស់វេជ្ជបណ្ឌិតនៅក្នុងក្រសែភ្នែកសាធារណៈជនហើយនឹងជួយលើកកម្ពស់ទំនាក់ទំនងប្រកបដោយសុខដុមរមនារវាងវេជ្ជបណ្ឌិតនិងអ្នកជំងឺ។